Kapansin-pansin ang pagiging organisado ng mga langgam, at sa kaunting paggabay, maaari mong “sanayin sa palikuran” ang kolonya mo na gumamit ng itinalagang “basurahan” para mapanatiling mas malinis at mas madaling alagaan ang kanilang tirahan. Sa ligaw, likas na gumagawa ang mga langgam ng mga itinalagang lugar para sa basura, o midden, kung saan nila itinatapon ang mga tira-tirang pagkain, patay na langgam, at iba pang kalat.
Sa paglilipat ng tambakang ito sa isang maliit na lalagyan, maipapakita mo sa mga langgam mo ang bago at kumbinyenteng tapunan ng basura sa kanilang tirahan. Narito kung paano masasanay ang mga langgam mo na gumamit ng maliit na basurahan!
1. Hanapin ang Kasalukuyang Tambakan
Karaniwang pumipili ang mga langgam ng isang partikular na lugar sa kanilang pinaghahanapán ng pagkain para gawing tambakan ng basura. Para mahanap ang kasalukuyan nilang tambakan, masusing obserbahan ang lugar at hanapin ang maliit at magulong bahagi kung saan madalas mag-iwan ng mga langgam ng mga itinapon, gaya ng lumang pagkain o patay na langgam. Pinipili ng mga langgam ang lugar na ito batay sa layo nito sa pugad at sa mga katangian gaya ng halumigmig at temperatura. Karaniwan itong nasa malamig at tuyong lugar para hindi mabulok ang basura.

Mga “Tambakan” ng Basura ng mga Ligaw na Langgam
2. Ihanda ang Lalagyan
Pumili ng maliit at mababaw na lalagyan na magsisilbing “basurahan.” Mainam ang takip ng bote o maliit na plastik na lalagyan. Tiyaking malinis at walang amoy ang lalagyan, dahil sensitibo ang mga langgam sa mga hindi pamilyar na amoy na maaaring makaistorbo sa kanilang gawain.
3. Ilipat ang Basura sa Lalagyan
Maingat na ilipat ang kasalukuyang tambak ng basura papunta sa bagong lalagyan. Maaari kang gumamit ng sipit o maliit na patpat para ilipat ang basura nang hindi masyadong naaabala ang mga langgam. Sa paglalagay ng dati na nilang tambakan sa lalagyan, para mo na ring itinatalaga iyon bilang bagong tapunan ng basura ng mga langgam mo.
4. Ilagay ang Lalagyan sa Dating Lugar
Ilagay ang lalagyan mismo sa dating kinaroroonan ng tambak ng basura. Malamang na bumalik ang mga langgam sa pamilyar na lugar na ito at makilala nila ito bilang tapunan. Dahil umaasa ang mga langgam sa nakagawian at mga bakas ng pheromone, ang paglalagay ng lalagyan sa dating lokasyon ay hihikayat sa kanila na dito na maglagay ng basura.
5. Hayaang Masanay ang mga Langgam
Bigyan ng panahon ang mga langgam na masanay sa bagong ayos. Kapag napagtanto nilang nasa loob na ng lalagyan ang kanilang basura, malamang na patuloy nila itong gagamitin bilang takdang tambakan ng basura. Sa paglipas ng panahon, likas na ilalagay ng mga langgam ang kanilang basura sa bagong lalagyang ito. Kalaunan, maiuugnay ang "amoy" ng basurahan sa amoy ng tambak ng basura, at maililipat mo ito para mailipat din ang tambak.

"Sinanay sa palikuran na Harvester Ant" sa kagandahang-loob ni Andrew Smith
6. Regular na Pagpapanatili
Para mapanatili itong malinis at maiwasan ang amag, regular na alisin ang ilan sa laman ng lalagyan. Tiyaking may kaunting basura pa ring maiiwan sa loob nito para patuloy na iugnay ng mga langgam ang tambak sa lalagyan.
Bakit Ito Gumagana
Likas sa mga langgam na panatilihing maayos ang kanilang tirahan, at sinusunod nila ang nakasanayang gawain, lalo na pagdating sa pagtatapon ng basura. Ilipat lang ang dati nilang tambakan ng basura sa isang lalagyan at sinasanay mo na silang gamitin ang maliit na "basurahan" na ito bilang bago nilang tapunan. Sinasamantala ng paraang ito ang nakagawiang asal ng mga langgam upang mapanatiling malinis ang kanilang kapaligiran nang hindi mo kailangang masyadong makialam.
Sa pagtitiyaga at kaunting panghihikayat, matututo ang iyong mga langgam na gamitin nang mahusay ang basurahan nila, kaya mas malinis at mas malusog ang kanilang tirahan - at mababawasan ang oras na ginugugol mo sa pagpapanatili nito!